Tamatiekonfyt vir die siel

Resep

(deur Annamie Stander,  GK Musina)

 My resepte is sonder fieterjasies, geen geweek, gewag of geskil nie.

• Soos ek onthou, weeg kilogram vir kilogram, met ander woorde een kilogram tamaties vir een kilogram suiker.
• Was en sny die tamaties se koppe af, gooi dit in die Twista en gee dit ’n paar draaie, net om dit te breek, nie te verpulp nie.
• Gooi nou laag vir laag al om die beurt met die suiker in ’n swaarboomkastrol, wat jy wel so ’n veeg olyfolie op die bodem gegee het.
• Ek het gemmer in ’n sakkie toegeknoop en laat saamkook, seker so ’n vinger gemmer, dan haal ’n mens dit mos agterna uit (en eet lekker alleen daaraan in die kombuis!)
• Kook teen middelmatige hitte vir so ’n uur, voeg dan die sap van een suurlemoen by en prut vir nog so ’n uur of tot die konsistensie reg lyk.
• Skep kort-kort die skuim wat bo-op vorm af.  As dit onweer is, sal jy waarskynlik môre verder moet kook.
• Laat die konfyt afkoel en kyk hoe dit vir jou lyk. As jy te lank of te vinnig kook, word die konfyt donker.
• As jy tevrede is, bottel in gesteriliseerde bottels en bedek konfyt met ’n brandewyngeweekte papiertjie, gesny in die vorm van die bottel se deksel.
• Skroef, toe, plak jou eie plakkertjie op en siedaar!