Deur Jo van Rooyen
In oorlede oupa se tyd sou die eienskappevan ʼn deugsame vrou heel eenvoudig geklink het, maar as ’n mens mooi kyk het dit nogal merkwaardig ooreengestem met die wyse woorde van die ou moeder van Lémuel, koning van Massa, in Spreuke 31.
Oupa se deugsame vrou sou jy altyd deur ’n ring kon trek. Sy het haar kinders, al ses, goed groot gemaak. Een doop van haar beskuit sou ʼn goeie koppie koffie met een slurp half leeg gelaat het. Dominee se vrou kon staat maak op hierdie deugsame vrou en daar was altyd plek aan tafel vir ʼn ontydige kuiergas. Haar waarde was, volgens die ou vertaling, ver bo korale.
Maar tye het verander.
Tog… party goed bly dieselfde en ander goed verander nooit nie! Die deugsame vrou moet steeds sorg vir haar huis en haard, man en kinders. Durf ek sê dat haar taak wat huishouding betref, makliker gemaak is deur die wonder van tegnologie, maar moeiliker deur die verandering van lewensomstandighede. Buiten die take van destyds, het die deugsame vrou van vandag heel waarskynlik nog voltyds werk in die korporatiewe wêreld en is haar kind(ers), al het sy ene of ses, baie meer blootgestel aan die groot wêreld met sy verleidings en versoekings. Haar verantwoordelikheid as vrou het egter nie verander nie.
’n Mens sou die Griekse woord “arete” wat as deugsaamheid in ons Afrikaanse Bybel vertaal is, miskien nou meer van toepassing kon maak as oorlede oupa se vertolking daarvan. Dit eggo die betekenis van: “Om manmoedig te lewe!” In die lewe het man en vrou ewe veel manmoedigheid nodig om wel deugsaam te lewe én heel anderkant uit te kom. Die aanslae van die wêreld kan soms oorweldigend wees en die eenvoudige vereistes van deugsaamheid staan skraal teen die woedende winde van die aanslae teen die vrou en haar huis.
Die kruks, nee die kruk van die deugsame vrou, van oupa en Lémuel se tyd, sowel as ons moedige vrouens van vandag, lê steeds in die eeu-oue boodskap van Petrus: “En juis om hierdie rede moet julle alles in die stryd werp om julle geloof te verryk met deugsaamheid…”
Deugsaamheid… die deugsame vrou streef om goed te doen… sy streef moedig daarna om goed te doen, om goed te leef, goed op te tree, reg te praat – om in alles te leef met die wysheid wat sy van God ontvang. Ons moet mekaar die gebed van die Hebreërbrief toebid: “Mag God julle toerus met alles wat goed is, sodat julle sy wil kan doen. Mag Hy deur Jesus Christus in ons tot stand bring wat vir hom aanneemlik is” (Heb. 13:21). Dit moet die gebed van elke vrou, nee van man en vrou, elke gelowige wees. Hierdie gebed vra dat ons toegerus sal word deur die Here self met “alles wat goed is” (deugde), sodat ons “sy wil kan doen” (deugsaam kan wees). Om deugsaam te leef, moet ʼn mens jou vaste vertrou in God bely, en jou geloof uitleef in ʼn wêreld vol vertwyfeling en aanslae van Satan en ons eie sondigheid.
Vrou, wees manmoedig in jou geloof! Wees dapper in die geloof. Staan vas teen die aanvalle van die bose. Dra jou geloof openlik en met vreugde uit.
